မြန်မာနိုင်ငံအရေး ပူးပေါင်းဆောင်ရွက်မှု ကော်မတီ (ယူကေ) မှ ရွေးကောက်ပွဲဥပဒေများအပေါ် နိုင်ငံရေးသဘောထား ထုတ်ပြန်ချက်
နအဖ စစ်အစိုးရက ၂၀၁၀ ခုနှစ်၊ မတ်လ (၈) ရက်နေ့တွင် ထုတ်ပြန်သော ရွေးကောက်ပွဲဆိုင်ရာ ဥပဒေများသည် တွေ့ဆုံဆွေးနွေးရေးနှင့် အမျိုးသားရင်ကြားစေ့ရေးကို လုံးဝ ပစ်ပယ်လိုက်သည့် ဥပဒေများဖြစ်ကြောင်း တွေ့ရှိရသည်။ ထိုကြောင့် အမျိုးသားဒီမိုကရေစီ အဖွဲ့ချုပ်အနေဖြင့် ရွှေဂုံတိုင်မူကို ဆက်လက်ကိုင်စွဲ၍ ပါတီတည်ရှိမှုထက် ပြည်သူ့အကျိုးအတွက် တိုက်ပွဲဝင်သွားနိုင်မည်ဟု ကျွန်ုပ်တို့အနေဖြင့် ယုံကြည်ပါသည်။
ရွေးကောက်ပွဲ မတိုင်မီနှင့် ရွေးကောက်ပွဲအပြီးကာလများတွင် ဖြစ်ပေါ်လာနိုင်မည့် နိုင်ငံရေး မငြိမ်သက်မှုများ၊ အထွေထွေအကြပ်အတည်းများတွက် တာဝန်ရှိသူမှာ နအဖ သာဖြစ်ကြောင်း ကျွန်ုပ်တို့ရှုမြင်သည်။ တိုင်းရင်းသား ဒေသများတွင် စစ်ပြင်နေမှုများ၊ စစ်အင်အားတိုးချဲ့မှုများသည် နိုင်ငံရေး ပြဿနာကို လက်နက်ကိုင် အကြမ်းဖက်နည်းဖြင့် အနိုင်ယူ ဖြေရှင်းလိုသည့် စစ်အာဏာရှင်စနစ်၏ သဘောသဘာဝ များအဖြစ် မှတ်ယူသည်။
လွတ်လပ်ရေးရပြီးချိန်မှ ယနေ့ကာလအထိ နိုင်ငံရေး ပြဿနာများကို လက်နက်ဖြင့် ဖြေရှင်းခြင်းသည် နိုင်ငံရေး အဖြေမဟုတ်ကြောင်း နအဖ အနေဖြင့် အလေးအနက် ထားသင့်သည်။ စစ်ရေးအရ ခြိမ်းခြောက်၍ တိုင်းရင်းသားလက်နက်ကိုင် အဖွဲ့အစည်းများအား နယ်ခြားစောင့်တပ်များအဖြစ် အတင်းသွပ်သွင်းနေခြင်းများသည် ပြည်တွင်းစစ်မီးများ တောက်လောင်ကာ အမျိုးသားရေးပြိုကွဲမှုများကို ဦးတည်သွားနိုင်ကြောင်း စိုးရိမ်ဖွယ်ရာ တွေ့ရှိနေရသည်။
ထိုသို့ ဖြစ်ပေါ်လာမည့် သမိုင်းအကျိုးဆက်များသည် နအဖ၏ တာဝန်သာဖြစ်ကြောင်း ကျွန်ုပ်တို့ အလေးအနက် သတိပေးလိုသည်။
ကုလသမဂ္ဂနှင့် နိုင်ငံတကာမှ တိုက်တွန်းတောင်းဆိုချက်များကို နအဖမှ မသိကျိုးကျွံပြုလျက် ဆက်လက်၍ အကြမ်းဖက်ကာ တဖက်သက် ဖြေရှင်းနေခြင်းများသည် တိုင်းပြည်အား အန္တရာယ်အတွင်းသို့ ကျဆင်းစေရန် ခြိမ်းခြောက်လျက် ရှိသည်။
ထိုကြောင့် အချိန်မနှောင်းမီ ဒေါ်အောင်ဆန်းစုကြည်နှင့်တကွ ဖမ်းဆီးထားသော တိုင်းရင်းသား ခေါင်းဆောင်များ၊ နိုင်ငံရေး အကျဉ်းသားများ အားလုံးကို လွှတ်ပေး၍ အမျိုးသားရေး ပြဿနာများကို ငြိမ်းချမ်းစွာ ဆွေးနွေးဖြေရှင်းခြင်းသာလျှင် စစ်မှန်သောအဖြေဖြစ်ကြောင်း ပြောကြားလိုသည်။
တရားမျှတမှု မရှိသည့် ၂၀၀၈ ဖွဲ့စည်းပုံ အခြေခံဥပဒေနှင့် စစ်အာဏာရှင်စနစ် ဖျက်သိမ်းရေးကို ဆက်လက်၍ မဆုတ်မနစ် လုပ်ဆောင်သွားမည်ဖြစ်ကြောင်း ကျွန်ုပ်တို့၏ သဘောထားကို ထုတ်ပြန်ကြေငြာလိုက်ပါသည်။
မြန်မာနိုင်ငံအရေး ပူးပေါင်းဆောင်ရွက်မှု ကော်မတီ (ယူကေ)
No comments:
Post a Comment