လူတိုင်း ခေါင်းဆောင် ဖြစ်ပါသည်။

ကျွန်တော် ဂမ်ဘာရီ လာပြီ ဆိုတဲ့ စာရေးလိုက်မိတော့ လူတွေက ဘာတွေ လုပ်ကြရမှာလဲ ဆိုတာတွေ မေးလာကြသလို၊ ကိုယ်ဘာသာ ဘာလို့ ပြန်မလုပ်တာလဲလို့ မေးလာကြတာတွေ ရှိပါတယ်။ တစ်ချို့တွေကလည်း UN ကို မျှော်လင့်ထားနေလို့လား ဆိုပြီး မေးကြတာတွေ၊ ပြောကြတာတွေရှိလာာကပါတယ်။

ဒီနေရာမှာ ဘာတွေ လုပ်ကြမလဲဆိုတာကို အရင်ပြောကြည့် တိုင်ပင်ချင်ပါတယ်။

လူတိုင်းခေါင်းဆောင် ဖြစ်ပါသည်။

လူတိုင်းခေါင်းဆောင် အဖြစ်နဲ့ ကိုယ့်ကို ကိုယ် သတ်မှတ်ပြီး ပြည်သူတိုင်းပါဝင် နိုင်တာတွေကို လုပ်ဆောင်ကြဖို့ ကျွန်တော်တိုက်တွန်းချင်ပါတယ်။ လူ ရာထောင်ချီတဲ့ လူအုပ်ကြီး တန်းစီပြီ ဆန္ဒထွက်ပြဖို့ စည်းရုံးခေါင်းဆောင်မှ ခေါင်းဆောင်လို့ သတ်မှတ်နိုင်တယ်လို့ မထင်ပါဘူး။

မတရားတာကို မတရားဘူးလို့ သိပြီး၊ မတရားမူတွေကို ကိုယ့် အသိစိတ်နဲ့ ကိုယ့်ကိုကိုယ် ခေါင်းဆောင်ပြီး တွန်းလှန်ရာမှာ ပြည်သူတိုင်း ပါဝင်လုပ်ဆောင်နိုင်ကြပါတယ်။

နအဖတွေဟာ အကြောက်တရားနဲ့ တိုင်းပြည်ကို အုပ်ချုပ်ဖို့ ကြံနေတာပါ။ အဲဒီ အကြောက်တရားနဲ့ပဲ အုပ်ချုပ်ခဲ့တာပါ။ ဒီနေ့ သူတို့ အကြောက်တရားကို ဆက်လက်လုပ်ကိုင် အုပ်ချုပ်နိုင်ပါ့မလား ...
အဲဒီ အဖြေဟာ .. ပြည်သူတွေ လက်ထဲမှာ ရှိနေပါတယ်။

အဲဒီ အဖြေကို ဖြေကြည့်ကြရအောင်။

သူတို့တွေက ဥပဒေကို လက်တလုံးခြား လှည့်ပြီး အမျိုးမျိုး လိမ်ခဲ့ကြတာ အားလုံး အသိပါ။ အရှက်မရှိ ဗြောင်လိမ်တာတွေလဲ အများကြီးပါ။ ဒီတော့ ကျွန်တော်တို့ကလည်း သူတို့ ပြောနေတဲ့ ဥပဒေဆိုတာကို လက်တလုံးခြား ပြန်လုပ်ပြီး၊ သူတို့ကို တိုက်ခိုက်လို့ရပါတယ်။

နအဖတွေဟာ သူတို့တွေ လုံခြုံဖို့၊ အတာအဆီး အကာ အရံတွေ လုပ်ပြီး ကန့်သတ်လေ့ရှိပါတယ်။ ကျွန်တော်တို့က အဲဒီ အတားအဆီး အကန့်အသတ်တွေရဲ့ နောက်ဆုံး စည်းရိုးနားအထိ ကပ်ပြီး အလုပ် လုပ်ကိုင်လို့ရပါတယ်။ ကိုယ့်ကို ကိုယ်လည်း အန္တရာယ်ပေးရာ မရောက်ပါဘူး။

ဥပမာ ... အခု ရွှေတိဂုံ ဘုရားပေါ်ကို မှတ်ပုံတင် မပါရင် တတ်လို့ မရဘူးလို့ ရည်ရွယ်တဲ့ စာမျိုးတွေကို ဘရားဂေါပကတွေက ထုတ်သလိုမျိုး လုပ်လာကြပါတယ်။ ပြည်သူတွေကလည်း ကိုယ့်ဘက်က အန္တရာယ်ကင်းအောင်၊ သူတို့ကိုလည်း တိုက်ခိုက်ရာ ရောက်အောင် ကျွန်တော်တို့ ပြည်သူတွေက မတရားတာကို တွန်းလှန်ကာ ကိုယ့်ဘာသာ ခေါင်းဆောင်ပြီး လုပ်တဲ့ အနေနဲ့ သူတို့ တားထားတဲ့ နေရာကနေ လမ်းမပေါ်က ဘုရားကို ရှိခိုးတာ လုပ်လို့ရပါတယ်။

အိတ်ထဲမှာ မာကာပန် (Marker Pen) တွေ ဆောင်ထားပြီး လူလစ်တာနဲ့ သူတို့ကို ဆန့်ကျင်တဲ့ စာတွေ နံရံတွေမှာ ရေးလို့ရပါတယ်။
ဥပမာ ....

• လူသတ်သမား သန်းရွှေ
• သံဃာတွေကို သတ်တဲ့ ဘာသာမဲ့ သန်းရွှေကို တော်လှန်ကြ
• နအဖ လူလိမ်တွေ၊ နိုင်ငံတကာကို လိမ်နေပြီ
• အပြစ်မဲ့ သံဃာတော်တွေကို ချက်ခြင်းလွှတ်
  

အစရှိသဖြင့် စဉ်းစားမိတာတွေကို ကိုယ့်ဘာသာခေါင်းဆောင် လုပ်ပြီး ရေးလို့ရပါတယ်။

ပတ်ဝန်းကျင်မှာ နအဖနဲ့ သက်ဆိုင်သော စီပွားရေး လုပ်ငန်းများကို ကိုယ့်ဘာသာ ဖော်ထုတ်ပြီး ပြည်သူလူထုကို နီးစပ်ရာ သပိတ်မှောက်ဖို့ နှိုးဆော်နိုင်ပါတယ်။
ဥပမာ ..

• သန်းရွှေမိသားစုပိုင် ဂျေဒိုးနတ်
• နအဖနဲ့ ပူးပေါင်းလုပ်ကိုင်နေတဲ့ သက်သာ ဆပ်ပြာမှုံ့၊
  
• မြတ်ခိုင် ဦးစီးသော လျှပ်တပြတ် ဂျာနယ်၊
  
• ကျော်ဆန်းပိုင်သော မြေနီကုန်းမှ အင်တာနက်ကဖေး

အစရှိတာတွေကို ခေါင်းဆောင် လုပ်ပြီးသပိတ်မှောက် နိုင်ပါတယ်။

မိမိပတ်ဝန်းကျင်မှာရှိသော နိုင်ငံရေး အကျဉ်းသားများနှင့် သူတို့၏ မိသားစုများကို တတ်နိုင်သမျှ အားပေးစကား ပြောပေးခြင်း၊ ကူညီပံပိုးခြင်း အစရှိသည်တို့ကို လုပ်ကိုင်နိုင်ပါတယ်။ ထို့အတူ ဘုရားရှိခိုး ဆုတောင်းရာမှာလဲ နိုင်ငံရေး အကျဉ်းသားများအမြန်ဆုံး လွတ်မြောက်စေရန်နှင့် မြန်မာနိုင်ငံ စစ်အာဏာရှင်လက်အောက်မှ အမြန်လွတ်မြောက်ရန် နေ့စဉ်ဆုတောင်းခြင်းများ ပြုလုပ်နိုင်ပါတယ်။

နအဖအား ယနေ့အထိ ကံဆောင် သပိတ်မှောက်နေကြသေ သံဃာတော်များကို ဆွမ်းကွမ်း ကပ်လှူ ပူဇော်ခြင်းများဖြင့် ကိုယ့်ကို ကိုယ် ခေါင်းဆောင်ပြီး တော်လှန်နိုင်ပါတယ်။

ထို အရာများထက် ပိုပြီး တတ်နိုင်လျှင် လက်ကမ်းစာစောင်များ ဖြန့်ဝေခြင်း၊ နီးစပ်ရာလူများကို ဤသို့ တော်လှန်နည်းများကို ဖြန့်ဝေခြင်း၊ ထိုထက်ပိုသော ထိရောက်သည့် တော်လှန်နည်းများကို စုပေါင်းတိုင်ပင် လုပ်ဆောင်ခြင်း အစရှိသဖြင့် မတရားမှုများကို တတ်နိုင်သမျှ တော်လှန် လုပ်ကိုင်နိုင်ပါကြောင်း .. တင်ပြလိုက်ပါသည် ခင်ဗျာ။

လေးစားစွာဖြင့်
ကိုထိုက်